www.Khmer-Note.com

គ្រោះថ្នាក់ រថយន្តក្រុង អូឡាំពិក បុករថយន្ត ស៊ីអរវី អ្នកស្លាប់ ជាជនជាតិកូរ៉េ កើនឡើងម្នាក់ទៀត សរុប៥នាក់ និងរងរបួស៦នាក់

www.khmer-note.com — Tue, 18 Jun 2013 14:19:40 +0000

ប្រភព៖ ដើមអម្ពិល

-ជនរងគ្រោះស្លាប់ ជាជនជាតិកូរ៉េ និងអ្នករងរបួស ជាជនជាតិតៃវ៉ាន់

កំពង់ធំ៖ គ្រោះថ្នាក់ចរាចរដ៏ គួរឲ្យរន្ធត់ និងតក់ស្លុត យ៉ាងពន់ពេក នៅតាមផ្លូវជាតិលេខ៦ ក្នុងឃុំចំណារក្រោម ស្រុកស្ទោង ខេត្តកំពង់ធំ កាលពីរសៀលថ្ងៃទី១៨ ខែមិថុនា ឆ្នាំ២០១៣ នោះ ជនរងគ្រោះ ដែលជាជនជាតិកូរ៉េ បានស្លាប់ម្នាក់ទៀតហើយ ដូច្នេះអ្នកស្លាប់កើន ឡើងចំនួន៥នាក់ និងអ្នករងរបួសធ្ងន់ស្រាល ចំនួន៦នាក់ ក្នុងនោះ រងរបួសធ្ងន់ ៣នាក់ ។

អធិការរងនគរបាល ស្រុកស្ទោង ខេត្តកំពង់ធំ ទទួលផែនចរាចរណ៍ លោក ហ៊ុន ហ៊ាន ដែលចុះជួយអន្តរាគមន៍ នៅកន្លែងកើតហេតុ និងបានជួយគាស់ យកសពជនរងគ្រោះពី ក្នុងរថយន្តទំរាំហើយ នៅយប់ថ្ងៃដដែលនេះបាន ឲ្យដឹងថា គ្រោះថ្នាក់ចរាចរណ៍ ខាងលើនេះ បានកើតឡើង រវាងរថយន្តក្រុង របស់ក្រុមហ៊ុន អូឡាំពិក ពាក់ស្លាកលេខ ភ្នំពេញ 3B-6344 បានបើក តាមបណ្តោយផ្លូវជាតិលេខ៦ ក្នុងទិសដៅពីខេត្តសៀមរាប បានវ៉ារថយន្តមួយគ្រឿងទៀត ដែលបើកចំពីមុខ ហើយជ្រុលទៅបុក រថយន្តស៊ីអរវី ពាក់ស្លាកលេខ ភ្នំពេញ 2B-2796 ខណៈកំពុងបើកបរក្នុងទិសដៅពីរាជធានីភ្នំពេញ ទៅខេត្តសៀមរាប បណ្តាលឲ្យ រថយន្តស៊ីអរវីឆេះនិងខ្ទេចស្ទើទាំងស្រុង ។

លោក ហ៊ុន ហ៊ាន បានបន្តថា ជនរងគ្រោះ ដែលជិះនៅ ក្នុងរថយន្ត ស៊ីអរវី គឺជាជនជាតិកូរ៉េទាំងអស់ ពោលមួយ គ្រួសារតែម្តង ក្នុងនោះ ឪពុកម្តាយ និងកូនស្រី ប្រុសចំនួន៤នាក់ ដែលមានអាយុក្រោម និងលើស១០ឆ្នាំបន្តិចបន្តួច ។ លោកបានបញ្ជាក់ថា គ្រោះថ្នាក់នេះបានបណ្តាលឲ្យ បុរសជាឪពុកនិងប្តី និងកូនប្រុសស្រី ចំនួន២នាក់បានស្លាប់ នៅកន្លែងកើតហេតុ ដោយគាបជាប់ នៅក្នុងរថយន្ត ហើយនៅ យប់ថ្ងៃដដែលនេះ កូនម្នាក់ទៀតបាន ស្លាប់នៅ មន្ទីរពេទ្យ ខណៈស្រ្តីជាម្តាយ និងកូនម្នាក់ទៀតបានរងរបួស យ៉ាងធ្ងន់ធ្ងរជាទីបំផុត។

ដោយឡែក ខាងរថយន្តក្រុង របស់ក្រុមហ៊ុន អូឡាំពិកវិញ អ្នកជិះនៅក្នុងរថយន្តសរុបចំនួន១៨នាក់ ក្នុងនោះ ជនជាតិចិនតៃវ៉ាន់ ចំនួន១៥ នាក់ អ្នកនាំដើរលេងកំសាន្ត និងបកប្រែម្នាក់ (Guide) អ្នកបើករថយន្តម្នាក់ និងព្រូរថយន្តម្នាក់ ។ លោកបានបញ្ជាក់ថា ក្នុងចំណោមជនរងគ្រោះ ដែលជិះនៅក្នុងរថយន្តក្រុង ខាងលើនេះ ព្រូរថយន្តបានស្លាប់ភ្លាមៗ នៅនឹងកន្លែងកើតហេតុ ខណៈអ្នកបើក រថយន្តដាច់ជើងម្ខាង និងមនុស្សចំនួន៤នាក់ ផ្សេងទៀត រងរបួសធ្ងន់ស្រាល។

លោក ហ៊ុន ហ៊ាន បានបន្តថា សពជនរងគ្រោះដែលស្លាប់ ហើយគាបជាប់នៅ ក្នុងរថយន្ត កម្លាំងសមត្ថកិច្ចទើបនឹងគាស់ យកចេញអស់នៅវេលា ម៉ោងប្រមាណ៦៖៣០នាទីយប់ថ្ងៃទី១៨ ខែមិថុនា ឆ្នាំ២០១៣នេះទេ។ លោកថា កំហុសតាមការសន្និដ្ឋាន ជាជំហានដំបូងបង្ហាញថា រថយន្តក្រុងជាអ្នកបង្កហេតុ ពីព្រោះបានវ៉ារថយន្ត មួយគ្រឿងទៀត ដែលបើកពីមុខ រួចហើយបានជ្រុលចង្កូតទៅបុករថយន្តជនរងគ្រោះ នៅខាងស្តាំងដៃ ខណៈបើកបញ្ច្រាសទិសគ្នា។ លោកបានបន្តថា ក្រោយរថយន្ត ក្រុងបានបុក រថយន្តស៊ីអរវី បានឆាបឆេះ ប៉ុន្តែបានប្រជាពលរដ្ឋ នៅកន្លែងកើតហេតុ ជួយពន្លត់។

បច្ចុប្បន្ន រថយន្តទាំងពីរគ្រឿងត្រូវបានសមត្ថកិច្ចយកទៅរក្សាទុកដើម្បីរង់ចាំការ ដោះស្រាយបន្តទៀត។ នេះជាគ្រោះថ្នាក់ចរាចរណ៍ដ៏គួរឲ្យរន្ធត់ថ្មីមួយទៀត នៅក្នុងប្រទេសកម្ពុជា ដែលអ្នកបើកបរទាំងឡាយ ត្រូវមានការប្រុងប្រយ័ត្ន គ្រប់ៗគ្នា៕

ជំនុំជម្រះករណី ឆាណាយវា សុំនៅក្រៅឃុំ

www.khmer-note.com — Tue, 18 Jun 2013 12:21:32 +0000

ប្រភព Postkhmer

ជនជាប់ចោទ ដេវិដ ឆាណាយវា ពេលនាំឡើងសាលាឧទ្ធរណ៍។ រូបថត មិនា

ភំ្នពេញៈ អតីតមេធាវីលោក ដេវិដ ឆាណាយវា កាលពីថ្ងៃចន្ទ ត្រូវសាលាឧទ្ធរណ៍បើកសវនាការជំនុំជម្រះលើបណ្តឹងឧទ្ធរណ៍សុំនៅក្រៅឃុំពាក់ព័ន្ធនឹងការប្រើអំពើហិង្សា លើក្រុមអ្នកកាសែតកាលពីឆ្នាំមុន។

លោក ប៉ុល សំអឿន ប្រធានក្រុមប្រឹក្សាជំនុំជម្រះបានថ្លែងថា តាមអង្គហេតុកាលពីយប់ថ្ងៃទី១៨ មីនា ២០១៣ មានគ្រោះថ្នាក់ចរាចរណ៍មួយកើតឡើងពេលនោះមានអ្នកយកព័ត៌មាន មួយក្រុមបានទៅថតរូបស្រាប់តែឈ្មោះដេវិដ ឆាណាយវា ទាស់សម្តីគ្នាហើយក៏វាយលើអ្នកកាសែត។ ឆាណាយវា ត្រូវសាលាដំបូងរាជធានីសម្រេចឃុំខ្លួនបណ្តោះអាសន្នរង់ចាំសវនាការក្រោមការចោទប្រកាន់ពីបទប្រើអំពើហិង្សាលើអ្នកកាសែតនៅលើមហាវិថីព្រះមុនីវង្ស ក្នុងសង្កាត់បឹងរាំង ខណ្ឌដូនពេញ។

ក្រោយការឃុំខ្លួន ឆាណាយវា បានប្តឹងមុនអង្គសេចក្តីសុំនៅក្រៅឃុំនៅថ្ងៃទី១៦ ឧសភា ២០១៣ តែសាលាដំបូងរាជធានី មិនអនុញ្ញាតឲ្យនៅក្រៅឃុំទេ និងបន្តការឃុំខ្លួននៅពន្ធនាគារជាបន្តទៀត។ ការបដិសេធរបស់តុលាការនេះដោយសារថា៖«ដើម្បីការពារជនជាប់ចោទកុំឲ្យប្រព្រឹត្តបទល្មើសសាជាថ្មីឬគេចខ្លួនពីការផ្តន្ទាទោសរបស់តុលាការ»។

ការសម្រេចនោះត្រូវឆាណាយវា ប្តឹងឧទ្ធរណ៍ហើយសាលាឧទ្ធរណ៍បានបើកសវនាការលើបណ្តឹងនេះកាលពីម្សិលមិញ។

ក្នុងសវនាការពីម្សិលមិញ ដេវិដ ឆាណាយវា ប្រាប់តុលាការថា គាត់ប្តឹងឧទ្ធរណ៍ដោយសារតែគាត់មានមុខរបរនិងទីកន្លែងពិតប្រាកដហើយការចោទប្រកាន់ក៏មិនទាន់ច្បាស់លាស់ ហើយគាត់នឹងត្រឡប់មកវិញនៅពេលដែលតុលាការកោះហៅ។

លោកបន្តថា៖«ខ្ញុំមានតួនាទីជាទីប្រឹក្សាព្រឹទ្ធសភាផ្នែកច្បាប់មានឋានៈស្មើរដ្ឋលេខាធិការ។ ខ្ញុំសន្យាមិនរត់គេចនិងចូលខ្លួនពេលតុលាការត្រូវការហើយសុំដាក់ប្រាក់ធានាចំនួន ២០ លានរៀន»។

លោក ដេវិដ ឆាណាយវា អាយុ៤១ឆ្នាំ ខ្មែរសញ្ជាតិអាមេរិក ចូលមកកម្ពុជាក្នុងឆ្នាំ១៩៩៤ ធ្លាប់ជានគរបាលជាទីប្រឹក្សាប្រធានព្រឹទ្ធសភាលោក ជា ស៊ីម ហើយធ្លាប់ធ្វើជាមេធាវីតែត្រូវលុបឈ្មោះពីបញ្ជីមេធាវីក្នុងឆ្នាំ២០០៣។

លោក ដាវិដ ឆាណាយវា និងក្មួយប្រុសឈ្មោះ ប្រាក់ អូហ្វី ហៅ ម៉ាអូហ្វី និស្សិតវ័យ ២០ឆ្នាំ ត្រូវចាប់ខ្លួនថ្ងៃទី១៩ ខែមីនាឆ្នាំ២០១៣ ដោយសង្ស័យថា ស្ថិតនៅក្នុងចំណោមមនុស្ស៧នាក់ដែលវាយប្រហារមកលើអ្នកសារព័ត៌មានក្នុងហេតុការណ៍គ្រោះថ្នាក់ចរាចរណ៍មួយ និងបញ្ជូនទៅឃុំខ្លួននៅពន្ធនាគារព្រៃស។

គួររំឭកថា នៅថ្ងៃទី២០ ឧសភា សាលាដំបូងរាជធានីបានបើកសវនាការលើករណីឈ្មោះ ដេវិដ ឆាយណាវា និងអតីតរដ្ឋលេខាធិការក្រសួងយុត្តិធម៌លោក យាន ស៊ីណា ក្រោមការចោទពីបទបានវាយទៅលើក្រុមអ្នកកាសែតកាលពីយប់ថ្ងៃ ទី១៨ មីនា។ ប៉ុន្តែ ត្រូវបានពន្យារពេលបន្ទាប់ពីមេធាវីការពារក្តីរបស់លោក ឆាណាយវា ធ្វើពហិការដើរចេញពីបន្ទប់សវនាការ ហើយចុងចោទបានសុំប្តូរចៅក្រមជម្រះសំណុំរឿងនេះ។

លោកស្រី ចាំង ស៊ីណាត ចៅក្រមសាលាដំបូងរាជធានីបានយោងទៅលើសំណើរបស់ចុងចោទបានសម្រេចពន្យារពេលសវនាការលើកទៅពេលក្រោយដែលមិនទាន់កំណត់ជាក់លាក់។

ដាវិដ ឆាយណាវា ឥឡូវនេះកំពុងប្រឈមនឹងបទចោទប្រកាន់ចំនួន២ពីតុលាការរួមមានការប្រើប្រាស់អាវុធខុសច្បាប់និងប្រើហិង្សា (វាយ)ទៅលើក្រុមអ្នកកាសែត។ ចំពោះករណីប្រើប្រាស់អាវុធខុសច្បាប់គាត់ត្រូវតុលាការកាត់ទោសកំបាំងមុខដាក់ពន្ធនាគារ១៨ខែ កាលពីថ្ងៃទី២៩ ខែកុម្ភៈ ឆ្នាំ២០១៣។ ចំណែកសំណុំរឿងហិង្សា(ដីធ្លី)ឆ្នាំ ២០០៧ នៅខេត្តព្រះសីហនុ សាលាឧទ្ធរណ៍បានលើកលែងបទចោទកាលពីថ្ងៃទី៣០ ឧសភា ឆ្នាំ២០១៣។

លោក ហ៊ាន រិទ្ធ តំណាងមហាអយ្យការថ្លែងថា បណ្តឹងឧទ្ធរណ៍មាន២នាក់តែឈ្មោះ ប្រាក់ អូហ្វី បានដកពាក្យប្តឹងវិញ។ទាក់ទិន គតិច្បាប់ជនជាប់ចោទគួរតែឃុំនៅពន្ធនាគាររង់ចាំសវនាការអង្គសេចក្តីរបស់សាលាដំបូង។

លោកចៅក្រម ប៉ុល សំអឿន ឲ្យដឹងថា សាលដីកានេះប្រកាសនៅថ្ងៃទី២៦ ខែមិថុនានេះ៕

iPhone 5 ស្រោបមាស និងដាំពេជ្រ យ៉ាងស្រស់ស្អាត

www.khmer-note.com — Tue, 18 Jun 2013 09:28:21 +0000

iPhone 5 គឺជា Smartphone ដែលទំនើប និងពេញនិយមបំផុត ហើយនៅពេល iPhone 5 ស្រោបទៅដោយមាស និងដាំពេជ្រទៀតនោះ វាកាន់តែធ្វើអោយទូរស័ព្ទកាន់តែអស្ចារ្យ។ កាលពីពេលថ្មីៗនេះក្រុមហ៊ុន Goldgenie បានដាក់បង្ហាញ iPhone 5 ស្រោបមាស និងដាំពេជ្រ Superstar ២ម៉ូដែលសំរាប់អតិថិជនរបស់គេ។ ម៉ូដែល Gold Superstar ស្រោបទៅដោយមាស 18K ទំងន់ 200g ហើយម៉ូដែល Gold Superstar Ice បន្ថែមទៅដោយពេជ្រជាច្រើនរយគ្រាប់ ដែលមានទំងន់សរុប 5.5 ការ៉ាត់ សំរាប់តំលៃវិញ Gold Superstar មានតំលៃប្រហែល $75,500 រីឯ Gold Superstar Ice វិញមានតំលៃប្រហែល $107,000។ តើប្រិយមិត្តទាំងអស់គ្នាចង់បាន iPhone 5 នេះទេ?

Khmer-note

ព្រះសង្ឃថៃ ត្រូវបានចោទប្រកាន់ពីបទមានជីវិតសម្ភារនិយម

www.khmer-note.com — Tue, 18 Jun 2013 09:24:39 +0000

ប្រភព ៖ Postkhmer

រូបភាពវីដេអូយូធូប បង្ហាញព្រះសង្ឃមានយន្តហោះផ្ទាល់ខ្លួន។ BKP

ក្រុងបាងកកៈ ការិយាល័យព្រះពុទ្ធសាសនាជាតិបានទទួលពាក្យបណ្តឹងជាច្រើនស្តីពីព្រះសង្ឃជិះរថយន្តទំនើបៗនិងប្រើប្រាស់សម្ភារម៉ាកល្បីៗថ្វីបើព្រះអង្គត្រូវបានកំណត់ឲ្យរស់នៅក្នុងជីវិតអត់ធ្មត់និងភាពសាមញ្ញក្តី។

អគ្គនាយកការិយាល័យព្រះពុទ្ធសាសនាជាតិលោក ណុបផារ៉ាត់ បេនចាវ៉ាតាណាណុន បាននិយាយកាលពីថ្ងៃអាទិត្យថា មនុស្សជាច្រើនបានត្អូញត្អែរអំពីការឃើញព្រះសង្ឃកំពុងរស់នៅក្នុងជីវិតស៊ីវិល័យដែលផ្ទុយនឹងវិន័យសាសនាដែលប្រឆាំងនឹងសម្ភារនិយម។

ថ្មីៗនេះវីដេអូខ្លីមួយនៃព្រះសង្ឃបីអង្គគង់ក្នុងយន្តហោះឯកជនមួយគ្រឿងត្រូវបានគេដំឡើងចូលក្នុងគេហទំព័រយូធូប។ក្នុងវីដេអូ នោះ ព្រះសង្ឃទាំងបីអង្គបានកំពុងពាក់កាសម៉ាកល្បី និងពាក់វ៉ែនតាខ្មៅព្រមទាំងមានកាបូបម៉ាកល្បីLV មួយត្រូវបានគេឃើញនៅក្បែរព្រះសង្ឃមួយអង្គ។

លោកណុផារ៉ាត់ បាននិយាយថា៖«ខ្ញុំបានណែនាំឲ្យក្រុមមន្ត្រីតាមដានព្រះសង្ឃទាំងនោះ ហើយបើសិនជាព្រះអង្គទាំងនោះ ត្រូវរកឃើញថារំលោភការប្រៀនប្រដៅរបស់ព្រះពុទ្ធសាសនា នោះនឹងត្រូវពិន័យ»។

លោកបាននិយាយថា មានបណ្តឹងជាច្រើនផងដែរអំពីព្រះសង្ឃនៅវត្តល្បីៗជាច្រើនក្នុងប្រទេសថៃដែលទិញរថយន្តទំនើបៗនិងកំពុងប្រើប្រាស់សម្ភារថ្លៃៗ។

លោកបាននិយាយថា បើសិនជាព្រះសង្ឃទាំងនោះមានសង្ឃដីកាថា រថយន្តទំនើបៗទាំងនោះត្រូវបានសិស្សគណប្រគេនវាក៏នៅតែមិនសមរម្យសម្រាប់ព្រះអង្គ ដែលមានរថយន្តស្ព័ររាប់សិបគ្រឿងនៅក្នុងអារាមរបស់ព្រះអង្គដែរ។

លោក បានបន្តថា៖«លើសពីនេះក៏មានសង្ឃដែលមិនបានសិក្សារៀនសូត្រពុទ្ធវចនៈបានត្រឹមត្រូវដែរ ព្រោះសង្ឃខ្លះផ្តោតលើមន្តអាគមនិងព្យាយាមធ្វើពាណិជ្ជកម្មតាមសកម្មភាពសាសនា»៕ CC

នាំក្មេងស្រីពីរនាក់ ទៅលក់ឲ្យតាតា នៅឈូកទិព្វ២ ប៉ះចំស្ទាវរំលោកម្នាក់ ម្តងព្រឹកឡើង នាងប្តឹងឲ្យ នគរបាល ឃាត់ខ្លួន

www.khmer-note.com — Tue, 18 Jun 2013 09:22:34 +0000

ប្រភព ៖ ដើមអម្ពិល

ខេត្តកណ្តាលៈ ក្មេងស្រីពីរនាក់ បានមកដាក់ពាក្យ បណ្តឹងនៅនគរបាល ក្រុងតាខ្មៅ ឲ្យជួយរកយុត្តិធម៌ ចំពោះ ២នាក់ ប្តីប្រពន្ធបានល្បួងនាងទាំងពីរនាក់ ទៅលក់ឲ្យ តាតា នៅសណ្ឋាគារឈូកទិព្វ២ តែប៉ះចំស្ទាវធ្វើសកម្មភាពរំលោភ រហូតបានម្នាក់ម្តងៗ លុះព្រឹកឡើងក្មេងស្រី ទាំងវិលត្រឡប់មកផ្ទះវិញ បានមកដាក់ពាក្យ បណ្តឹង នៅ ប៉ុស្តិ៍ នគរបាល ឲ្យជួយស្រាវជ្រាវ ទើបនៅថ្ងៃទី១៧ ខែមិថុនា ឆ្នាំ២០១៣ នគរបាលក្រុងតាខ្មៅ ហៅជនសង្ស័យទាំង ពីរ នាក់ទៅសាកសួរដោយក្មេងស្រី ទាំងពីរមានអង្គការ និងឯកសារ ត្រឹមត្រូវក៏សុំគោលការ ពីព្រះរាជអាជ្ញាធរ ឃាត់ខ្លួននិងនាំយក ទៅកាន់តុលាការ ដើម្បីចាត់ការទៅតាមផ្លូវច្បាប់។ ហេតុការណ៍ ឃាត់ខ្លួនកើតឡើងកាលពី ល្ងាចថ្ងៃទី១៧ ខែមិថុនា ឆ្នាំ២០១៣ បន្ទាប់ពីហៅទៅសាកសួរ នៅអធិការដ្ឋានក្រុងតាខ្មៅ ។

លោក ស៊ឹម ប៊ុតបណ្ឌិត អធិការនគរបាលក្រុង តាខ្មៅ បានឲ្យដឹងថា ជនរងគ្រោះមានគ្នាពីរនាក់ ជាក្មេងស្រី មិនទាន់ គ្រប់អាយុ១៥និង១៤ឆ្នាំ ដែលជាអនិតិជន រស់នៅ ក្នុងភូមិដើមគរ សង្កាត់ដើមមាន ក្រុងតាខ្មៅ ខេត្តកណ្តាល មាន ស្រុកកំណើតនៅភូមិលេខ៥ឃុំត្រើយស្លា ស្រុកស្អាង ខេត្តកណ្តាល ។ ចំណែកឯជន សង្ស័យទី១ ឈ្មោះ ប៊ូ ពៅ ភេទស្រីអាយុ៤៦ឆ្នាំមានទីលំនៅនៅភូមិអំពិល ឃុំក្រាំងយ៉ូវ ស្រុកស្អាង ខេត្តកណ្តាល និងទី២ ឈ្មោះ ជួន ចយ ភេទប្រុសអាយុ ៤៥ឆ្នាំ រស់នៅក្នុង ភូមិព្រែកតាពៅ សង្កាត់តាខ្មៅ ក្រុងតាខ្មៅ អ្នកទាំងពីរបច្ចុប្បន្នរស់នៅក្នុងភូមិ ដើមគរ សង្កាត់ដើមមាន ក្រុងតាខ្មៅ ខេត្តកណ្តាល។

លោកបានបន្តទៀតថា មុនពេលកើតហេតុជនសង្ស័យឈ្មោះ ប៊ូ ពៅ បានលួងលោមនាងរងគ្រោះទាំងពីរដោយ ប្រាប់នាងថា ទៅញុំស៊ុបតែមិនបាន ប្រាប់គោល ដៅនោះទេ បន្ទាប់មកជនសង្ស័យបាននាំជនរងគ្រោះជិះម៉ូតូជាមួយឈ្មោះ ជួន ចយ ឌុបទៅភ្នំពេញ ហើយជនរងគ្រោះទាំងពីរបានសួរជនសង្ស័យថា ឌុបនាងមក ធ្វើអ្វីពេលនោះជនសង្ស័យប្រាប់ថា មកចាំក្មួយរបស់គេ ហើយជនសង្ស័យទាំងពីរក៏នាំនាងរងគ្រោះទាំងពីរចូលទៅក្នុងសណ្ឋាគារឈូកទិព្វ២ ដោយឡើងទៅជាន់ទី៩ រួចហើយឲ្យនាងទាំងពីរ ចូលទៅក្នុងបន្ទប់ ដោយមានបុរសម្នាក់ មិន ស្គាក់អត្តសញ្ញាណ នៅក្នុងបន្ទប់នោះផង បន្ទាប់មកជនសង្ស័យ បានទាញទ្វារបិទហើយ ដើរចេញ ទៅបាត់ ពេលនោះជនរងគ្រោះ ភ័យក៏បានស្រែកហៅជនសង្ស័យ ប៉ុន្តែត្រូវបុរសនោះគំរាម សម្លាប់បើហ៊ាន នៅតែស្រែក ទើប នាងទាំងពីរនៅស្ងៀម ហើយនៅយប់នោះបុរស នោះធ្វើសកម្មភាពរំលោភនាង បានម្នាក់ម្តងៗ នៅក្នុង យប់នោះរហូតដល់ម៉ោង២២និង០០នាទីជនសង្ស័យ ក៏បាននាំនាងរង គ្រោះត្រឡប់ មកផ្ទះវិញ ដោយគំរាមថា កុំប្រាប់អ្នកណា បើមិនដូច្នោះគេ នឹងសម្លាប់ចោល ។ ប៉ុន្តែជនរងគ្រោះ បានមកដាក់ពាក្យបណ្តឹង នៅនគរបាល ប៉ុស្តិ៍ឲ្យជួយអន្តរាគមន៍ និងបានហៅជនសង្ស័យទាំងពីរ រួចហើយសុំគោល ការណ៍ព្រះរាជអាជ្ញា ហើយឃាត់ខ្លួននាំ យកទៅកាន់តុលាការ ឲ្យចាត់ការទៅតាមផ្លូវច្បាប់ តែម្តងទៅ។

បច្ចុប្បន្ន ជនសង្ស័យត្រូវបានបញ្ជូន ទៅកាន់ដើម្បីចាត់ការទៅតាមផ្លូវច្បាប់៕

www.Khmer-Note.com

ជំនុំ​ជម្រះ​ករណី ឆាណាយវា សុំ​នៅ​ក្រៅ​ឃុំ

iPhone 5 ស្រោបមាស និងដាំពេជ្រ យ៉ាង​ស្រស់​ស្អាត

ព្រះសង្ឃ​ថៃ ត្រូវ​បាន​ចោទ​ប្រកាន់​ពី​បទ​មាន​ជីវិត​សម្ភារនិយម

ជំនុំជម្រះករណី ឆាណាយវា សុំនៅក្រៅឃុំ

iPhone 5 ស្រោបមាស និងដាំពេជ្រ យ៉ាងស្រស់ស្អាត

ព្រះសង្ឃថៃ ត្រូវបានចោទប្រកាន់ពីបទមានជីវិតសម្ភារនិយម